 |
| Ikan Arsik (versi Corps CTMH) yang sudah dieksekusi sebagian besar (difoto khusus utk keperluan Artikel ini) |
Oleh : Albiner 'Rabar' Siagian*
Ra, torop do hita na hea umbegesa ende na uli on. Torop muse do ra hita na somal mangendehonsa jala tau sude hatahatana i. Save the Best for Last. Ende on digurithon Phil Galdston, Wendy Waldman, dohot Jon Lind di taon 1989, jala diendehon Vanessa Williams taon 1992 marhite album The Comfort Zone.
Mansai tarbarita do antong album on. Disi diharuarhon album on di taon 1992, ende on manigor diojakhon di tirket paopathon di Billboard Top 100 lagu soul di Amerika. Alani i ma, ende on didok ma songon apulapul di si Vanessa Williams di na sumurut ibana sian parlumbaan Miss America (Miss America resignation scandal).
Save the Best for Last, i ma ballada taringot tu sahalak anakboru na bajar na sinta mallabab tu sahalak dolidoli. Nunga pola martaontaon si doli i sai manggohi pikiranna, andorang so, ujungna, si doli i mamuhai mamungka mardongan dohot anakboru i, di na so panagamanna.
On ma deba ponggol parpudi ni ende i:
But now we're standing face-to-face
Isn't this world a crazy place?
Just when I thought our chance had passed
You go and save the best for last
La da da da - da da.-
Sometimes the very thing you're looking for
Is the one thing you can't see
Sometimes the snow comes down in June
Sometimes the sun goes round the moon
Just when I thought our chance had passed
You go and save the best for last
You went and saved the best for last
Yeah...
Di sada tingki di manogot ni ari, hira pukul 7.30 WIB (hirahira 5 taon na salpu), tongon di pardalanan tu parkarejoan, tarbege au ende on marhite radio di motor. Manigor huingot ma muse hata ni sahalak pandita sangga mangalehon panorangion nasida di ulaon Seminar Sehari “Revitalisasi Fungsi Keluarga Kristen” di HKBP Porsea Kota, na marpardomuan tu Ulaon Taon Keluarga HKBP 2016 (tongon ahu sada parhata di ulaon i). Didok amang i hirahira songon on: “Ompunta najolo i, nunga malo manajemen moderen. Tarida do i sian cara nasida mangalompa dengke (ihan mas, jahir, pora-pora, asaasa, simanjo, siopat, haruting, sibahut, dohot na asing). Molo mangalompa dengke angka ompunta na jolo, sai jumolo do dilapik hudon i dohot angka ragam ni uramuram, isara ni mobi, sotul, baoang rabba, manang bulung ni gadong hau. Di ginjangna i ma dipatitir angka dengke i. Dungkonni, dilakkopi ma muse dengke i dohot uramuram songon sinangkin. Dilompa ma dengke i angonangon. Marsaor ma antong tonggi ni dengke i dohot angur ni angka uramuram i. Diasomi ma muse dohot unte jungga. Bah, tos ma daina. Holan manganggo angurna i pe ndang binerengbe simatua na tongon mamolus di joloniba.”**)
Laho mangan ma. Jumolo do antong uramuramna i panganon, ai di toru dope dengke i. Olo do dua tu tolu ari i asa suda. Anggo di roha, ari paopathon ma mangan dengke. Hape, ala naung ngalingali lompan i, dipalas ma muse, huhut dipahusor lompalompaan i. Saonari, marhusor ma dengke i tu toru jala uramuram na di toru i tu ginjang. Tong, mangan uramuram ma ari paopathon sahat tu ari paonomhon. Dung pe di ari papituhon, jumpang ma tingkina manganhon dengke i, na tumabo i. On ma na nidokna: Save the best for last!
Hombar tu son, huingot ma muse uju i tingki di huta sangga mangan. Sai rap mangan do hami antong, lumobi di parmanganon borngin. Dibagi natuatua i ma tu hami gulamo na tinutung i sadabe. Paniopna adong aturan. Sai tangan hambirang do maniop gulamo (gabbas) i, jala uluna i di ginjang.
Boasa ingkon songon i aturanna? Adong dua lapatanna. Na parjolo, molo tiniop gulamo i di tangan hambirang, gotilon ma i otihotik atuk ni indahan i. Molo dipeakhon do gulamo i di atas panganan i, ndang tarbahen manggotil i otihotik. Alani i, boi do dang suda dope indahan, hape atukna nunga suda (Aturan na asing mandok: “Boi do tambu anggo indahan, alai lompan, ndang!). Na paduahon, ingkon jumolo do uluna i panganon, dung i pe sibuk (tongatonga dohot ihur) ni gulamo i. Sada nari Save the best for last.
Angka dongan, tudos tusi do ra nang parngoluon on. Asa tahan uji, asa sabam, asa hemat, asa sari tu ari marsogot, ingkon do hita tagam di angka ragam ni parungkilon. Mamorsan silang, mian di tonga-tonga ni antuasu, manuhuk auga, dohot ragam ni angka hamaolon na asing tudos do i tu Save the best for last. Happy ending, didok angka parhata sileban.
*) Guru Etos dohot Revolusi Mental na marbisoloit
**)Digandai hombar tu haporluan
*****
